盧頌之（DaDa）男友趙勁皓（King）早排贏咗個健美先生獎牌，仲將個獎牌喺父親節當日送咗畀囡囡安嵐（新聞連結： http://bit.ly/2tVOfOA ）。

今日係安嵐（乳名踢踢）出世100日，廿四孝老竇嘅King喺尖沙嘴搞咗個百日宴，請咗一班圈中朋友嚟飲。DaDa同King接受訪問時話，湊咗囡囡3個月開始習慣，DaDa話：「以前瞓好多個鐘，o依家瞓得4個鐘，有時BB扭計，自己都會好忟同辛苦，不過當你每日見佢對住你笑，好似同你say hello咁，就覺得幾辛苦都值。」

King話呢段期間都有幫手湊女，佢負責開奶、餵奶，又要返酒吧、拍嘢同準備健美比賽，而嚟緊啲時間會畀晒踢踢：「酒吧唔再返，參加埋嚟緊8月澳門形態比賽，就金盆洗手。因為上網睇過，話小朋友3歲之前，佢所有時間都係你，3歲後就有自己思想，識到朋友仔。」

DaDa話遲啲都諗過復出，可以分擔奶粉錢，講到兩人仲未註冊，佢哋話已經諗定年尾去日本旅行結婚，到時會帶埋踢踢同行。King話今次唔係請太多圈內朋友嚟飲，只有陳柏宇、Jeana同王祖藍，而未來兩、三年想追個仔，因為King有好多運動細胞，想遺傳畀個仔。

而陳柏宇同未婚妻符曉薇一齊出席，佢哋帶咗BB衫褲，仲講笑話：「叫佢唔好掉留番畀我，希望好快可以用。10日後就到自己擺酒結婚。」