曼城中場耶耶托尼同佢嘅經理人一直以嚟都係一對活寶貝嚟，經理人鍾意亂講嘢就係人都知，又試過因為耶耶托尼生日無蛋糕所以同曼城搞到關係好僵。不過，經歷咗幾多風雨都好，耶耶托尼同經理人始終係打風都打唔甩，最新嘅故仔係已經34歲嘅耶耶托尼又「收回成命」，話唔再退出國際賽，又要幫科特迪瓦踢波喎！

查實耶耶托尼對上一次幫國家隊踢波已經係2016年9月，但佢嘅經理人喺Twitter透露：「耶耶托尼決定復出踢國家隊，佢希望幫科特迪瓦再贏多個冠軍。」問題係，科特迪瓦無份踢出年夏天嘅世界盃決賽周，下一個科特迪瓦有份嘅比賽，已經係2019年嘅非洲國家盃，咁即係話耶耶托尼未有耐打算退休？

英國《天空體育》就引述經理人嘅說話，強調季尾約滿曼城嘅耶耶托尼雖然今季英超只係踢得三場，計埋其他比賽都只係得八場，但係耶耶托尼唔會喺1月離開曼城，因為「佢希望三次贏得英超，又好享受用自己嘅經驗去幫助曼城嘅後生仔，而且喺英格蘭聯賽盃，耶耶托尼嘅上陣機會比所有曼城正選球員都要多」！

如果耶耶托尼真係咁諗嘅話，又真係幾鬼阿Q喎！

----------------
BFB CHAMPIONS 2.0 聖誕新年活動連環出擊，登入即送傳奇球星「林伯特」！ http://bit.ly/2xrTKGM