【更新內容】
特高娛樂提出延遲關門的要求，HMV及通利琴行營業至晚上10時，有網民稱10點後仍有飛出售，搶飛戰場轉至電話購票及網上訂購，特高娛樂於傍晚時指，電話購票至凌晨12點，網上訂購會24小時服務。

擾攘一日，真係差唔多一日，依家賣飛進度係點呢？

CityLine個網，依然係好多人都上唔到。
電話長期播音樂。
大家都累了。
五迷都要搵食，冇時間亦冇力氣再鬧。
至於請咗假嘅一批，繼續留守，排隊等「慢活」嘅server可以行得快番啲。

大家不期然都有一個疑問：五月天知唔知？

五月天所屬嘅「相信音樂」向《蘋果》表示：不回應。

另一個問題係，通利琴行、亞洲博覽館、麥花臣同HMV都會收工0架，不過依家究竟賣咗幾多飛？有幾多場係Full咗？

亞博本來係收傍晚6點，但佢3點半左右已經截咗龍，而且截龍過程非常戲劇化。因為之前有傳6點會sharp cut，現場有人問：「咁係咪要趕走晒之後啲人？」於是亞博先拿拿聲3點半截龍。有五迷於7點前趕到亞博，但亞博職員提早截龍，稱現時人龍會售票到7點，不再讓五迷排隊，約有10名五迷失望而回。

至於旺角麥花臣，亦於近6點截龍。大家氣氛平靜。至傍晚6點半，麥花臣五迷望見家鄉，尾龍得番廿幾人。

尖沙嘴金馬倫里通利依家約有40人左右，不斷有人加人。問過職員，佢哋都唔知邊場賣晒，邊場仲有飛賣……

傍晚6點15分，特高娛樂制作有限公司在fb宣佈：

「因應延誤了兩小時才開始發售門票，特高娛樂主動聯絡『通利琴行』門市負責人，提出延遲關門的要求，讓『Cityline購票通』補償延遲售票時間。

門市票站：
AWE亞洲博覽會館至晚上7時
HMV至晚上10時
通利琴行至晚上10時

電話購票將延至今晚12點
網上訂購24小時至門票售罄為止」

即係排緊通利琴行等買飛嘅你，仲可以排到今晚10點！

咁亞博一早被截龍嗰班五迷，山長水遠入到嚟但被提早「叮走」，豈不是好慘？

同問：一直上唔到網買飛嘅五迷，會否收工即衝去通利琴行撲飛？咁到時又大排長龍？