早排踩入樂壇嘅造型師馬天佑，佢今晚喺中環為其新餅舖開幕，仲搵咗少爺占同關心妍（Jade）嘉賓。少爺占被問到日前受襲嘅好拍檔當奴嘅近況，佢話自己噚日有打畀佢，有叫當奴唔好返工，但對方堅持今日要返工，少爺占就話：「哎呀你唔好返啦，咁快返工，個髮型又唔係好睇，o依家俾人剃咗一忽，好似河童咁，不過今晚都會見到佢。我鼓勵佢剃光晒個頭，寧願慢慢生（頭髮）。」

再問到當奴拆線未？少爺占話：「未呀，o依家兩日之嘛，不過佢好鍾意返工嘅，個口講到嘢咪得囉，不過o依家車又揸唔到，因為佢隻手要3個禮拜先可以拆石膏。」再講到當奴而家單手，返公司嗰陣點去廁所？少爺占話：「唔知佢呀，不過依家已經剪爛咗幾件衫，剪成冇袖，不過今晚返工先至見到佢，亦都唔知佢點搭的士，佢話自己返嚟。」

再問到少爺占家陣商台有冇加強保安？佢話：「保安都OK嘅，我哋會揸架車直接駛入去，走嘅時候亦會直接揸走，不嬲都唔驚，而且我哋係男人。不過都有加強到保安，o依家都有最少叫我哋較低隻窗，睇吓係邊個，以前淨係認車牌。」

講到麻利喺發生襲擊事件後喺fb寫咗段嘢，好似有啲depress咁啦，少爺占話：「其實所有人發生呢啲經歷，都好難唔depress，我哋又唔係當事人，不過呢佢而家心情都OK，但佢未返工，要休息一陣先，我哋會叫同佢一齊做節目嘅嘟姐（鄭裕玲）安慰佢囉。」