⁠⁠⁠今日又係一年一度嘅醫管局研討大會，作為醫管局年度盛事，除咗有唔同嘉賓醫生作主題演講，每年八方都好期待醫管局行政總裁梁栢賢(PY)個開幕致辭，因為實會有驚喜帶俾大家。

PY今年就大數醫管局嘅數碼科技發展，仲變身醫管局「小智」，係呀，寵物小精靈嗰個，帶大家探索未來醫療數碼隨身科技發展，預測未來隨身智能佩戴用品，加上手機app等等，可能隨時提供好似餐廳食物，好似菠蘿包嘅營養價值，即時俾埋健康貼士，仲可以分析埋朋友message，好似一個約你踢波，一個約你打麻雀，智能系統會話你做邊樣好啲，咁人就可以活很更長久，可以同家人樂天倫咁話，佢更PS咗張全家幅，有齊PY媽、PY爸、PY仔、PY女，望清楚啲，一家大細都係佢個樣。

唔講唔知，原來醫管局電腦系統都幾驚人。小智話現時存有的資料（official data）高達280TB，1TB等於850萬張紙，等於1萬棵樹。7.5萬個員工正服務330萬名病人，平均每分鐘有63個病人睇緊病，電子病歷系統每秒有20個數據交流。依家醫管局已經有唔同手機App同臨床電子系統，佢話會繼續發展，提供更好服務。