蔡少芬嘅內地節目《我最愛的女人們》請老公張晉同奶奶現身之外,陳法蓉都係嘉賓之一。好姊妹見面無所不談,陳法蓉踢爆蔡少芬當年想將張晉介紹畀好友,令張晉大感意外。令人更意外嘅係陳法蓉有一個埋藏11年嘅心結。
當年蔡少芬同張晉結婚,陳法蓉應邀參加婚禮,但佢俾傳媒跟到揸車去會場,結果蔡少芬對佢發火,陳法蓉話第一次畀好姊妹咁大聲鬧,因為當日係蔡少芬大喜日子,只好忍氣吞聲。蔡少芬喺節目問當時有冇嬲?陳法蓉話因為嗰次係蔡少芬第一次向佢發脾氣,所以印象好深刻,講嗰陣仲忍唔住喊。張晉見到咁就即解圍,話已經相隔11年,叫陳法蓉有乜仇恨同冤屈,不如一次過申訴,成功化解尷尬氣氛。