港股聖誕休市期間，A股一日跌、一日升，最強勁板塊唔係假期前喪炒嘅醫藥股，而係機械設備股份，一直超低殘嘅一拖A股（H股038）連續兩日升停板，連中車A股（H股1766）都單日升半成，似乎同樣港股板塊喺未來日子都值得留意。

機械設備股當中，中國重汽（3808）同龍工（3339）幾個月前曾經熱炒，中國重汽跌到反艇已經玩完，龍工隨住11月建築機械銷售回升，股價欲再挑戰高位。港股裡面，中車、中機工程 （1829）都係大落後，質素應以前者較正常，股價醞釀潛伏底，近期成交增加，踏入2018年值得備忘，基本因素稍後分析。

A股資金近年往往早着先鞭，喺好消息或數據出嚟前三幾個月，已完成收貨然後炒上。機械設備股係內地工業溫度計，今次機械設備股強勢，估值要pick up返牛市水平正常不過，但亦唔排除係預示內地工業以至經濟升溫在望，後者成立嘅話，對於整體A股同港股都係好消息。

喺12月20日，中央經濟工作會議對明年政策定調，第一，係穩健貨幣政策，要保持中性，第二，係積極財政政策。大致上係不變應萬變，即係曲線話畀大家聽，中央覺得經濟勢頭好，做得啱嘅嘢，就唔使加鹽加醋，下年依然自動增長。中央坐定粒六大把在手，港股、A股出年破頂走唔甩。

晉佳
www.facebook.com/advanceguy1/