新馬季開始至今已跑過三次谷草夜賽，徐雨石次次有馬贏，共進賬四W。其中上周三（20日）贏「埼豐」、「皇龍大師」起孖，兩駒均配見習生減磅，反映徐廐谷戰喜用見習生搏殺。

今期（27日）徐廐七駒中，「中華寶貝」、「雷公鑿」、「龍城快勝」均屬近績好之馬，尤其係第三場「龍城快勝」，上場未熱身下於谷草1650米追入一席第三走晒光。

由於當時係99倍大冷，故大家會感覺賽績符碌，但重看沿途走位，「龍城快勝」於大讓賽劣勢下以全場最快末段入圍，證明呢匹來港時評80分的自購馬跌至44分，終搵到支持點，本身體重不足1,000磅，越輕磅越有利發揮。

除「龍城快勝」評分大利，頭場徐廐另一駒「阿凡達」處境亦異常着數，上季59分以彈甩姿態贏田草1400米，現時落到53分，以本身速度轉跑谷草，級數可謂高出一大截，同組馬根本無法比擬。