昨日隻招行（3968）掛牌，以接近市場傳聞嘅暗盤價開出，大部份時間喺11元徘徊，收市企喺10.68元，高出招股價差唔多兩成半，中籤嘅朋友已經唔止搵餐晏仔。招行嘅成交好勁，全日達116億元，將個市嘅總成交推上去500億元樓上。股價會唔會仲有得升，睇怕炒上去嘅機會唔大，啲股民食髓知味，相信會沽出招行套現去抽工商銀行，不過，啲招行輪遲啲會掛牌，掛牌之前，招行喺低位會有買盤頂住。
國內銀行股愈嚟愈多選擇，喺供求定律之下，招行短炒嘅吸引力會大跌，個市咁旺，不如諗下香港啲銀行股。

滙控C輪9043：大市昨日好淡大鬥法，同就快期指結算有關，個市守得住17600收市，全靠隻大笨象滙控（005）頂實，滙控早兩日下試50日線迅速反彈，前日唞咗1日，昨日繼續推上，升過上去早排嘅高位142.10元，收市落番少少，報收141.60元，技術走勢好靚，成交又夠，會有力突破呢個關口，破位起碼睇升多兩三蚊。
隻C輪9043昨日收74仙，升8.8%，槓桿率19.1倍（有效15.4倍），仲有73日先到期，溢價0.5%，一啲都唔貴，價內輪，對沖值0.84，應該可以盡情發揮槓桿效應。呢個價買番啲，正股升上145元，隻輪會有4成升幅，就算升到144元有回吐，9043都會升到95仙，正股跌穿140元止蝕。
俊樺