【新增內容】

台灣綜藝天王吳宗憲兒子鹿希派（原名：吳睿軒）上月19日喺私人Instagram限時動態上發表「女友生病，要是沒好起來，我就做炸彈，炸台北市政府，全民賠罪。」言論，令他涉觸犯當地恐嚇公眾罪，可能要面對兩年以下有期徒刑（新聞連結： https://bit.ly/2PrIbZs ），結果吳宗憲喺事發後翌日，帶仔開記者會，講到叫個仔執包袱返美國（新聞連結： https://bit.ly/2Mrt5W3 ），鹿希派大家姐、吳宗憲長女吳姍儒又證實細佬遭禁足在家（新聞連結： https://bit.ly/2POHl9p ），以為鹿希派真係知錯返美，點知10日後鹿希派火速復出錄黃國倫節目，回歸演藝圈，鹿希派仲明言「唔會退出演藝圈」（新聞連結： https://bit.ly/2MHCicV ），日前更挑釁網民「歡迎酸民入場」（新聞連結： https://bit.ly/2wBoA0n ）。

搞咗幾場大龍鳳，今晚鹿希派喺台北舉行免費演唱會，吳宗憲及吳姍儒分別有工作在身，所以冇嚟捧場。着住白色外套、牛仔褲，頸掛Hip-hop金鍊登場嘅鹿希派，被問到日前士林地檢署判決要捐出嗰50萬新台幣（約12.7萬港元）點俾（新聞連結： https://bit.ly/2LOsFnK ），鹿希派話係家姐吳姍儒俾嘅，咁點還債俾家姐？鹿希派話：「我私下有寫歌給別人，算是用音樂打工，也會省吃儉用，努力還債。」

今日鹿希派喺音樂會上唱佢新專輯嘅歌為主，亦有翻唱佢偶像熱狗同蛋堡嘅歌，台灣《蘋果日報》指原本鹿希打算唱爸爸吳宗憲成名曲《我會想你》，不過佢話：「原本有想，因為現場可能會有些爸爸的粉絲，但鹿希派還是要靠自己，就不唱了。」

鹿希派話，自己完成表演後就會返美國伯克利音樂學院（Berklee College of Music）繼續學業，問到佢未來係咪會繼續留喺演藝圈，佢話：「音樂把我帶到哪我就到哪。」而鹿希派亦提到自己上鏡時較肥，返美後會努力健身，對於其父曾話比佢有型，鹿希派話：「他應該是喝醉了吧。」

不過，鹿希派今晚個騷一開場就出事，佢立刻嗌停說：「No！No！重來，我麥克風沒開，這是我自己的差錯！」後來先冇事。唱完第一首歌，佢問觀眾：「還可以嗎？」Fans有俾反應佢嘅，但鹿希派就好似嫌fans太靜，就串班觀眾似墓碑，郁都唔郁吓，之後有fans郁嘅，但真係得幾個。另外，鹿希派女兒、外號叫「水兒」嘅張姓女子今日亦有到場觀賞演唱會，神情專注。

精選娛聞，喺晒《娛果》
http://fb.com/appledailyent