香港政圈乜人都有，好似「政壇收音機」咁，近年同政府關係友好，掌握政圈異動，仲經常喺專欄度同某黨開片。收音機最近仲兼職做埋記者，搶埋人哋啲獨家料，搞到人心惶惶。
八方聽到小道消息，話說某精忠愛國人士，同兩、三間報館嘅記者食飯放料，咁啱路過嘅政壇收音機二話不說坐埋嚟一齊傾咗陣。點知第二日，除咗有份食飯嘅報館外，就連某報嘅知名專欄都有嗰單新聞，令人懷疑政壇收音機係咪做咗特約記者。原來就連八方嘅同事都中過招，有同事話，政壇收音機問完佢嘢後，發現啲料竟然又出現喺嗰個專欄度！呢啲事件連番發生，搞到有啲行家唔敢再向政壇收音機講嘢問嘢。