巴西里約奧運就嚟開幕，為咗迎接躍動炎夏，沙田新城市廣場特別設置里約競賽3D動畫LED屏幕裝置，相信係全港首個豎立商場嘅運動展館。

裝置外型係蜂巢嘅六角形，並利用場內嘅拱型玻璃天幕採光，原來係由08年北京奧運場館「水立方」設計師Chris Bosse同團隊LAVA創作；館內以清明上河圖長卷為概念，將118萬平方呎嘅巴西里約場館，納入2500厘米超闊環迴LED螢幕。

清明上河圖運動版內一班3D立體運動員，會喺九個分別仿照里約實景繪畫嘅運動場館內，進行射箭、田徑、跳水、劍擊等賽事，由於以3D動畫形式呈現，穿梭其中就可以感受到奧運氣氛。場館內亦展示咗其他運動項目嘅比賽短片，一次過可以盡覽39個運動項目嘅精髓。