「Chef Lemon」謝霆鋒向加拿大名廚David Rocco挑機，兩人喺FOX LIFE《名廚爭鋒》第一季進行中西廚藝對戰，節目將於3月25日推出(新聞連結： http://bit.ly/2GcWDCW )。

身在大陸嘅霆鋒接受電話訪問，佢話能夠代表華人出戰，壓力好大：「因為David係好有名嘅名廚，我哋要蒙眼去試當地美食，再複製同演繹自己版本，難度提升好多。」霆鋒讚David份人好隨和，大家都喺加拿大住過，某程度上想法同態度相似：「之前睇過佢節目，做得好好，好有人情味，佢捉每一個地方或國家料理神髓幾準，我都佩服佢呢個精神。佢嘅優勝之處係比我煮得耐好多，佢由細跟阿嫲入廚房，佢經驗比我豐富。」

講到有冇鑽研新招應戰，霆鋒表示去每一個地方之前，都有search當地最出名食材同菜式，始終係比賽，要有少少準備，問及私底下有冇搵人切磋？霆鋒坦言：「冇喎，又花時間又花心機。」之前霆鋒煮嘢被網民cap圖喺網上熱論，問到會唔會介意被網民惡搞？佢表示冇所謂：「尤其呢個唔係我嘅節目，規則唔係我嘅，剪接又唔係我，不過呢啲話題令我覺得自己節目可以再好啲。」平時有冇為家人下廚？霆鋒話：「每次返嚟都一定會煮嘢畀屋企人食，佢哋鍾意邊度菜？因為我成日都變，基本上每次都試唔同嘢，你可以問番佢哋。」

最後總結呢個節目，霆鋒表示：「好多人都問，『嘩！你玩咁大，今日《鋒味》喺成個中國都算係首席嘅美食節目，你攞自己去賭呀？咁輸咗呢？』當然我覺得有得打，有信心先去，唱歌聽得到，拍戲睇得到，煮嘢大家食唔到，好希望透過唔係自己嘅節目，係一個美國電視台節目，規矩係佢哋，十幾廿個專業評委係佢哋搵，喺嚴格同公正節目下去行呢步賭博，我係願意去行到咁盡，同時老土啲講番，好多西方廚一提到中菜又重味又重油，我今次用嘅方式希望畀世界各地嘅人睇到，中菜都可以係健康同時尚，如果大家想維護中餐，慢慢要向世界行出多一步。」

精選娛聞，喺晒《娛果》
http://fb.com/appledailyent