呢排歐洲主要聯賽出現有利客軍現象，尤其係禮拜日啲波，除咗英超米堡、意甲烏甸、德甲史浩克同法甲聖日耳門作客W外，西甲就竟然有三支客軍贏波；不過，西甲情況有啲唔同，因為賽程密同埋多場比賽踢水戰，令戰果有啲反常。
禮拜日西甲維拉利爾、切爾達同桑坦德全作客勝出，之不過我求大俠相信，唔係呢啲球隊實力過人，只不過係西甲周中開快車，加上場地起變化；又或者周中及下周對手較惡啃，於是呢周聯賽就有所避忌。
大家最緊要留意巴塞同皇馬，因為佢哋周六要硬碰，所以我求大俠驚佢哋禮拜三分別鬥馬拉加同馬體會時就住踢，波友自行推敲啦！

李華度終離AC勢向車仔送秋波
AC米蘭喺周一正式同巴西球星李華度解約，距離轉會市場重開得嗰一個月，AC始終唔肯畀佢𢭃多個月糧。點都好，佢離隊唔令人意外，家陣所有人都關心佢會以自由身轉去邊。
之前就傳過佢猛向英超嘅車路士送秋波，又係嘅，今時今日無幾多隊出得起高薪請球員㗎。