全球集資額最高嘅新股──工商銀行即將來港上市,上個禮拜五,破天荒地將佢嗰本初步招股書擺上網任睇。華華不甘後人馬上攞嚟刨,發現工行搵咗十二大猛人做股東,同今年中上市嘅中國銀行一樣都係12人,唔通12呢個冧巴,今年會帶嚟好運。
其實,有興趣投資呢啲超級大新股嘅大孖沙,來來去去都係嗰班人,好似工行呢次搵嗰12個股東,有7個上次都有做中行股東。除咗國壽,另外六個都係香港富豪。中行嗰次有黃廷芳家族嘅信和置業,同埋九龍倉主席吳光正;但呢次工行則由中信泰富同埋榮智健取代。
另外,呢次見到新加坡同埋中東資金都威威,分別都有兩名入選做股東,尤其是中東資金,之前沙地阿拉伯王子已經開晒口,話想買中國銀行,呢次科威特同埋卡塔爾都可以做到工行股東,可以話威過沙地。
不過,最令到華華詑異嘅,係東亞銀行同埋平安保險,上次中行招股,兩個都有入股,每人仲科水14億。呢次工行企業投資者名單,居然兩個都冇份。但係,其實兩個機構同工行都有好深嘅淵源。