重見親友的滋味，多好。因為參與民主派初選而被警以涉違《國安法》的顛覆政權罪拘捕的職工盟主席吳敏兒，今晚8時多在李卓人和多名職工盟戰友陪同下以3萬元獲准保釋，同樣被沒收旅遊證件，稍後要再到警署報到，透露同場的黃子悅亦以同樣條件獲准保釋。吳敏兒其間多次表示「我冇事，頂得住」，但形容被拘押的36小時「真係好驚慄」，指凌晨時分突然有人狂按家中門鈴，「真係好得人驚」。

談到警員向她宣讀拘捕理由一幕，她更不禁哽咽說：「嗰刻係有少少驚，係咪嚟唔切同你哋（職工盟戰友）講再見？係咪唔會見得返你哋？呢個係最難受」，並透露被扣押的「臭格」很凍，「係凍到你冇辦法瞓覺」，目前身體是「好難頂」，但意志仍然頑強。

她又指，心情十分激動，難以接受為何所有參加初選的人士都要被拘捕：「到底香港變成一個咩城巿？香港人嚟緊原來就好似我哋嗰36個鐘，喺一條好冰凍嘅隧道裏面，我哋大家真係要互相扶持，一步一步好小心咁行過呢條凍隧道，去到盡頭為止」，她強調：「大家都要加油，呢個時候更加係需要大家互相照護、互相支援。」

醫管局員工陣線主席余慧明於晚上11時許獲准保釋，須繳付3萬元保釋金、交出旅遊證件及不能離港，並須於下月10日報到。她認為今次警方大舉檢控與初選有關的人明顯是政治檢控，因為參與35+初選是《基本法》賦予的權利。獲釋後她表示有點疲倦，亦未有時間看新聞了解外間反應，但她叮囑香港人說「香港人更加加油」。

抗爭派黃子悅晚上保釋離開警署後亦在Facebook發帖，指被捕後曾經因為身體不適到醫院求診，現時身體已無大恙，感謝各位關心。本身為南區區議員的袁嘉蔚亦在Facebook指已經獲釋，「而家有啲攰」，明天會在其「番號ABC」YouTube頻道直播交代詳情。

國際職工盟強烈譴責港府拘捕行動，秘書長Sharan Burrow批評拘捕吳敏兒等53人是徹底侮辱基本人權，批評「港版國安法」鎮壓港人行使基本權利，必須撤銷。國際運輸工人聯盟秘書長Stephen Cotton指拘捕行動荒謬，進一步損害香港民主。

-----------------------------

《蘋果》英文版免費試睇：了解更多

英文版已登錄《蘋果》App，立即下載/ 更新：iOS / Android

-----------------------------

支持蘋果深度報道，深入社區，踢爆權貴，即Like蘋果專題及調查組FB專頁！