溫兆倫喺89年同大馬富家女友李美玲閃電結婚，結婚冇耐傳出搭上陳梅馨，結果李美玲喺93年提出離婚，溫兆倫又爆料聲稱有妻子不守婦道嘅證據。回復單身後，溫兆倫公開與陳梅馨拍拖，拍咗3年左右又分手，溫兆倫仲向陳梅馨追索14萬掟煲費，揚言欠債還錢天經地義。

直到96年，佢加入藝能動音，識咗助手潘燕妮（Winnie），佢哋02年喺澳洲註冊結婚，之不過又有傳兩人合資炒樓欠債，Winnie指溫返大陸避債，要佢一力承擔債務。

唔知係咪經歷兩次失敗婚姻，溫兆倫返咗去大陸賺人仔，逐漸邁向愛國之路。00年因拍攝內地劇《蒼天有眼》識咗苗紅，本來喺翌年排期註冊結婚，點知喺臨門一腳溫兆倫突然悔婚。

02年，溫兆倫回流無綫拍攝劇集《牛郎織女》，更以半打菠蘿包感動郭羨妮，成功贏得美人歸，點知郭羨妮拍拖後身價暴跌，兩人於05年分手收場。

跟住溫兆倫全面撤出香港，04年喺朋友介紹識咗溫嘉蓉，但係冇耐又有傳溫兆倫追求青島姑娘秦麗，不過呢段感情捱咗三個月，溫兆倫轉移目標潘星誼，秦麗即被打入冷宮，可惜09年潘星誼喺屋企跌倒，遭魚缸玻璃割損大動脈身亡。

直到13年，溫兆倫喺微博上載咗一張晚宴相片，而且喺寫著「難道大家真的不明白我想說什麼？以後不要怪我沒有通知你們哦？」之後有好多個「囍」字，承認同大陸演員趙庭展開第三段婚姻，跟住仲生咗個囡囡。