美劇《西部世界》（Westworld）女主角伊雲麗素活（Evan Rachel Wood）噚日喺演員工會頒獎禮雖然食白果，不過佢有喜訊宣佈，就係佢同音樂人男朋友Zach Villa訂婚。兩人噚日被影到一齊於無名指戴上銀色戒指，伊雲嘅發言人已經確實喜訊。

29歲嘅伊雲兩年前於洛杉磯表演時遇上Zach，隨後兩人組成樂隊Rebel and a Basketcase，去年9月推出首張大碟。今次係伊雲嘅第二段婚姻，佢前夫係英國男星占美比爾（Jamie Bell），而占美嘅愛情亦開花結果，佢本月中與美國女星凱特瑪拉（Kate Mara）宣佈訂婚。