時裝騷Tokyo Girls Collection（TGC）已舉行到第25屆，今次喺埼玉縣舉行盛會以「BEYOND」作為主題，安排從首屆開始行騷嘅土屋Anna同埋山田優、香里奈打頭陣登場，三人在天橋上脫下長褸，當土屋轉身即引起全場嘩然，見生完第三胎嘅佢不失大膽作風，穿上露出兩邊屁股嘅短褲，展示大髀上蛇形及蓮花紋身，連佢個12歲囝囝澄海都處男登場充當模特兒。

今屆盛會同樣星光熠熠，除土屋Anna、山田優、香里奈外，仲有水原希子、Becky、武田玲奈、新川優愛、桐谷美玲、河北麻友子同埋乃木坂46主將白石麻衣等，參與女星及model多達100人。桐谷美玲獲老友河北麻友子在台上肉緊啜面，而Morning娘舊將後藤真希都作產後首次行騷，佢穿紅色迷你裙大玩復古造型，生完兩個小朋友仍然大有睇頭。至於重磅女星渡邊直美都唔執輸，再次模仿美國天后Beyonce贏得掌聲，今次更出動假嬰老翻正版早前嘅抱B照。同時，人氣男星菅田將暉則以神秘嘉賓身份大唱新歌《呼吸》。