股市升破萬六點，成交額四百七十億，正是氣勢如虹，用任志剛總裁嘅講法，股市可能已上高原（plateau），但未見頂，財經演員青姐一早已經叫客戶入市，可惜左丁山唔係佢客戶，走晒寶，問青姐：「好唔好追貨！」青姐話：「喺高原跑步追貨，好容易氣力不繼，在高原逗留得耐，恐怕患上高山症！」講得咁玄，講佛偈咩！𠵱家好驚啫，止賺放貨怕太早，活力先生十幾蚊就放晒三八八（港交所），呢個星期睇怕喊到唔識出聲：追入呀，廿八蚊買入八號仔，到現在仍然喊到未收聲，我哋散戶真係唔知點好！

馬主N打電話嚟提醒：「喂，入籤抽馬嘞，四月二十六號開始，記得入籤呀，今年因為股市旺，相信好多馬會會員想做馬主，中獎機會細過舊年，記得唔好走雞呀！」馬主N在澳洲買下成棚馬，風險甚大，未必有回報，但夠運起嚟，其中可能有一隻係精英大師，咁就發達。買得馬來，就冇時間研究股票，馬主N咪走晒雞？馬主N騎騎笑：「好彩我太太對馬冇興趣，對股票有認識，佢一早話落，喺股市要做親中派，千祈唔好逢中必反，所以買低一揸股票，全部係中字派，包括中銀香港、中信泰富、中石油、中石化、中移動。佢有得益，就唔會哦我花錢買馬！」
N太係會計師，屬穩陣派，中銀、中信泰富、中石化都曾經係悶王之王，長期打橫行，郁都唔郁，不過一飛就沖天，N太笑到見牙唔見眼，證明佢嘅長揸不放投資法係正確嘅！分析T就認為中銀香港在中國銀行上市後（傳聞係五月上市）中銀香港嘅股價會受壓力，為中銀香港訂下一個止賺價，係穩健做法，畢竟中銀香港與中國銀行相比，冇晒吸引力，只不過係另一間香港銀行而已，唔會受到國際基金垂青也！