噚日萬人上街佔路「反送中」，特區政府特首林鄭月娥同三司龜縮拒絕面對群眾，晏晝示威者衝擊立法會示威區嘅警方防線，警員出胡椒又出催淚彈對付市民，好多人中招避都冇得避，但有警員因為冇帶定防暴裝備自己中招，反而可以直衝入立法會，大批警員走入立法會一度喺大樓內築防線，仲將示威者拘押喺立法會房間，直情將立法會變差館。

班差人將立法會變差館都未算，後來直情變埋休息室、娛樂室，好似之後外面氣氛緩和，大樓外示威者節節後退後，班差人稍事休息，其中一隊警員竟然仲圍埋合照，笑容滿面舉起手指公畀自己一個讚。

立會大樓淪為差人機舖

大樓外仍然繼續清場，大樓內就係另一個光景，呢個時候立法會儼如警察俱樂部，有警員放飯、有警員放下裝備，席地而睡，仲有警員玩手機，唔知係咪好似平日嚟參觀立法會嘅中小學生咁玩Ig打卡呢？

如果星期日最多工人姐姐嘅地方係中環，咁噚日最多警察嘅地方可能就係金鐘。八方記得當日行管會批准放差人入立會大樓，好似為保安理由，唔係畀差人入立法會打卡、打機，將立會變警察俱樂部，咁行管會又使唔使畀個交代其他議員？

除咗打卡留念，警察喺衝突中成功推進一大段距離後換更，當前線警員飲水休息時，長官訓話並稱讚同袍：「呢個係你哋嘅榮耀，呢個做得好，呢個係你應得嘅，畀啲掌聲畀自己！」一眾警員歡呼拍手叫好，爭啲以為噚日係警察同樂日㖭！

李八方