董太由香港第一夫人，忽然變成全國政協副主席夫人，心情一時難以平復，但係八方聽聞，董太嘅閨中密友一知董生辭職嘅消息，就第一時間送花送信，表示關心，重約佢兩公婆得閒出嚟飲吓茶。
點知董太拒絕好意，話自己近來好忙，暫時唔得閒見朋友，相信同搬屋有關。老董唔撈，董太事前全冇心理準備，𠵱家梗係要收拾細軟啦，好似嘉慧園咁，政府好君真用一元租咗佢原來個單位，再用十萬五千元租埋佢隔籬個單位畀佢用，董生辭咗職，重有兩至三個月時間搬，但始終都要畀番一個單位人家。
董太向《壹週刊》盡訴心中情，聽講本雜誌中環搶購一空。八方問位記者項德楓乜咁好嘢做到董太專訪，佢笑話好彩，因為本來買咗上周四港龍機票諗住同董生一齊上京，點知老董一改再改行程，佢都改咗六、七次機位，最後董生改坐中航，董太就一個人坐港龍先出發，咁咪搞掂囉。

傳真︰2623-9278
電郵︰[email protected]