近日有唔少日本嘅動漫喺台灣都遭到各方面嘅抨擊，先係日本經典動畫《多啦A夢》俾網絡博客同學者認為係一部「霸凌」動畫，好似角色胖虎(即係技安呢...)經常訴諸暴力，令模仿力強嘅兒童會喺不知不覺間學習，構成校園欺凌。

噚日就有台灣議員對當地有線電視頻道「Animax」質詢、指該頻道播放既動漫好似《變態王子與不笑貓》等內容露骨又不雅。

到今日，大家都會喺fb見到一份聲稱係台灣文化部嘅公文流傳，內容係要求「東立出版社」依照自律精神、「詳加審查」日本漫畫，針對對象包括《進擊的巨人》、《惡魔奶爸》等等，文尾仲有「部長　龍應台」水印。貼po者想帶出神級動漫——《進擊的巨人》又被官方challenge，之不過細心一睇，其實呢份公文上嘅時間，距今已有成年咁耐。唔係新聞。

對此，台灣國家通訊傳播委員會(NCC)嘅官員就解釋，當有民眾或團體陳情，相關單位就必須受理，而發送公文都只係標準程序之一，節目係咪要停播或者落架，NCC就冇預設立場喎。

其實呢，《進擊的巨人》如果喺逐漸「變質」嘅香港俾人投訴就話唔奇啫，之前呢套動畫就俾網民話，場景設定似足香港依家嘅社會政治環境，故事入面巨人出現，人類為求安全，故生活於三重高牆之內，維持咗一百年和平之後，有「超大型巨人」以壓倒性力量破壞城門；巨人入城衝入牆內捕食人類。有網民就將三重高牆拆解做「人權法治」、「一國兩制」同「文明道德」，而超大型巨人...當然就係...你懂的。