市況漸現疲態，大戶趕住食糊，濠賭、科網股利潤豐厚，自然先掟為敬，昨文已提戰友切勿高追，否則隨時接火棒。整體而言，魏力感覺氣氛仍不錯，熱錢在換馬炒其他主題，在供應短缺及一孩政策放寬的憧憬下，乳業股可以秤先。

內地奶荒惡化，全國鮮奶價格連升13個月，高中低檔奶一係斷貨，一係狂加價，望吓合生元（1112）近月45度角炒上，就知賣奶賺到豬籠入水。蒙牛（2319）、伊利都講明目前唔夠貨賣，可見情況嚴重。作為中國東北最大乳業商，半新股輝山乳業（6863）盈利有望水漲船高，加上現時估值較蒙牛折讓24%，值博率甚高。
輝山最大優勢是上中下游一條龍服務，上游牧場主要引入澳洲及新西蘭母牛飼養，為伊利等供應奶源，佔盈利76%；液態奶則佔盈利21%。輝山上市時，伊利更入飛5,000萬美元成為基礎投資者，冀聯手抗衡蒙牛，可見輝山的江湖地位。今年起，輝山更開始生產奶粉，由於奶源進口自外國，市場較具信心，未來有條件成為下一隻合生元！
集團9月底掛牌，上市價2.67元，相當於明年預測PE約17倍；現價3.03元，意味PE升至19.3倍。彭博資料顯示，蒙牛明年預測PE達25.3倍，輝山較其折讓24%，加上剛創新高，冇蟹貨易炒上，簡單追番蒙牛估值，已可見3.76元。

魏力
http://www.facebook.com/2012jason

有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange