田蕊妮（阿田）入行27年，由亞視到無綫，去年9月完成劇集宣傳即轉戰大舞台，舉行首個售票演唱會圓夢，然後便進入休假狀態，直至本月16日終於在社交網發文，宣佈已跟無綫約滿，正式結束12年賓主關係，隨後再公告將會自組公司，換句話說，往後的日子阿田將會自己管自己，自己做老闆，無拘無束。

阿田日前在觀塘接受《蘋果》訪問，對於過去半年，外界就她不續約大台有很多不同揣測，包括因為她欲與政見清晰的老公杜汶澤「齊上齊落」，自己也可以暢所欲言，所以決定離開藏身多年的comfort zone（舒適區），擺脫她口中的「緊箍咒」，同時亦有傳是大台受壓，阿田是被動式離場。阿田聞言即笑說：「首先開公司真係唔係咩大不了嘅嘢，只係需要去攞一個商業登記就可以喇！」

尚有不足半年便43歲的阿田，16歲參加亞視舉行的《未來偶像爭霸戰》入行，但最終沒有當上歌手，反而一直拍劇，其間亦有拍電影及在商台做DJ，演技一直備受讚賞的她，2013年成功坐穩視后之位，演技進一步被肯定，劇集亦拍完一個接一個。她說：「電視台當然係一個安全區，每個月有糧出，但嗰時每日都係跟住通告生活，兩個月通告完咗緊接第二套劇，諗得最多係收工返屋企有幾多個鐘瞓，沖涼先定睇劇本先？定係瞓醒先睇？個腦只係function呢啲嘢，好快一年、兩年就過咗。」

那麼，為何忽然覺醒要改變生活模式？阿田指有這個想法，絕對不是近月的事：「差唔多年幾兩年嘅事，我記得有一年拍咗120幾集，即係120幾個鐘頭嘅電視劇，每一日都喺度做，好似演戲演到無咗趣味，咁我就諗，觀眾都唔會睇得有趣味？我究竟應該為每日工作量負責，定係睇我嘅觀眾負責？」經過一輪思想鬥爭與矛盾，阿田最後得出的結論是：「跟住通告做人，每月有糧出係好安全，但呢個係階段性問題，如果我係新人，一定好想有人認識自己，但我唔覺得應該一世都係咁，我覺得而家應該搵返初心，唔想演戲只係一個工作。」

她又表示，做決定前已經衡量所有問題，包括會否有機會再拍劇，但最後決定「博一博」，因為真的好想改變。阿田坦言：「以前會計劃咗自己先，等自己穩定咗先為人哋，但我發現咁樣諗，你一世都係為自己，永遠都唔會足夠，點都覺得自己未穩定，我希望可以幫人哋諗吓，譬如有冇想做嘅角色？如果有新導演，我可唔可以喺佢哋需要我嘅時候幫到手呢？」

不過，阿田曾被老公杜汶澤爆「好細膽」，今次重大決定，可有諮詢老公意見？阿田淡淡定說：「我以前我真係好細膽，而且天秤座嘅人係選擇困難症，你畀樣嘢我做決定我會諗好耐，諗諗吓就冇咗件事；老公就係好衝動嘅行動派，佢影響到我大膽咗，多咗勇氣接受挑戰，以前嘅我唔會夠膽決定，所以今次我係決定咗先話畀佢聽，都冇咩需要問佢，我哋都咁大個，無需要咁樣傾，兩公婆傾得最多都係日常嘅瑣碎事同屋企人嘅嘢，同埋因為我哋都學佛，日常溝通會比較多佛學嘅嘢。」

對於未來，雖然阿田表明沒有太長遠的計劃，正如她在社交網撰文所寫，計劃往往追不上變化。但話雖如此，自組公司、沒有後盾，真不擔心老公暢所欲言，她的工作都會受牽連？事關甚少公開談政治的她，去年8月在社交網留言：「我依家開個記者會宣布（佈）一陣間會有一個記者會，嗰個記者會嘅內容係聽日會有一個記者會……」暗「寸」林鄭月娥開記者會只懂無限loop，已觸動到不少大陸網民玻璃心，揚言要抵制她；惟阿田對老公所有言論不但全無意見，更力撐說：「我好尊重每個人嘅立場，即係佢娶咗我，唔等於有啲嘢要做唔做得，唔講得，我唔覺得係咁樣，我覺得人生係為自己負責，當然唔好傷害人啦，但唔代表佢娶咗我後要呢樣唔好嗰樣唔好，我唔想做佢阿媽，何況佢阿媽都唔係咁。」

阿田還透露，老公曾經反過來問她，會否因為他的言論受影響？她說：「我同佢講唔使擔心，因為一個男人出嚟社會真係唔好綁手綁腳，想做乜咪做乜，當然唔係叫你去害人，但我亦都唔想我老公因為娶咗我而綁手綁腳。同埋呢樣嘢我好欣賞佢。」