上月下嫁同黨政策總裁袁彌昌嘅新民黨立法會議員容海恩（恩恩豬）尋日親證有喜！恩恩豬今日同傳媒茶聚，就透露預產期係明年農歷年初一，但就無透露係豬仔定豬女，保留神秘感。作為首個任內生仔嘅議員，恩恩豬話都想為懷孕議員爭取福利，佢日內將會去信立法會主席同議事規則委員會，要求畀坐月期間嘅議員授權黨友投票，等「議員媽媽」都可以履行議員責任。

懷孕4個月嘅恩恩豬今日同傳媒茶聚，雖然身穿鬆身衫但都見到肚仔突突，孕味出晒嚟。佢話今早已經就懷孕一事同立法會秘書處開會，爭取設有授權票、產假同埋喺立法會大樓增加哺乳設施。就授權票問題，由於《基本法》列明立法會大會議員要在席投票，所以更改空間唔大，但法例無講明議員喺委員會要在席投票，所以佢會去信議事規則委員會要求討論。不過討論需時，佢預計半年內都未必爭取得到。

至於產假方面，由於議員同立法會唔係僱傭關係，所以無有薪產假，但秘書處就建議佢請假，相信會獲批。咁恩恩豬會唔會按慣例請「前4後6」呢？佢就話唔會，反而好大機會「留守到最後一刻」，而產假都只會放2至3星期，仲話爭取喺宣佈財政預算案當日重返議會。自由黨張宇人曾經話唔應該有產假，恩恩豬就反駁，話應該多啲產假同育嬰假，要與時並進咁話。

提到做咗媽媽2020會唔會競逐連任，佢就話而家仍然會爭取留低，亦希望爭取更多媽媽友善政策，令婦女可以放心從政，打破傳統。至於會唔會再生，恩恩豬就話明年同後年都係選舉期，再加上而家已經係高齡產婦，所以都要考慮一下。