側田雖然自嘲生得細粒又光頭，但女人緣卻出奇地源源不絕，3年前同34D魔鬼身材嘅韓籍女友分手後，前年轉眼側田已經又墮愛河，跟一名長髮女打得火熱，早排參加內地真人騷《蒙面唱將猜猜猜》人氣翻生，宣布回流香港出廣東碟嘅側田，果然喺香港又活躍番，上周六喺灣仔拖男帶女蒲吧，仲被讀者王小姐「爆相爆片」捕獲。

王小姐接受電話訪問表示：「嗰晚半夜2點幾，我喺灣仔利源東街嘅酒吧DJAPA，見到側田同大班人入嚟坐低，佢好似主人家咁負責叫酒，叫咗威士忌、雞尾酒、啤酒，十幾個人要分開四張枱坐，一張大枱三張細枱，有男有女氣氛好熱鬧，佢啲朋友似係外國返嚟嘅竹昇仔女。」

從王小姐分享嘅相片同短片，見到側田坐喺大枱畀仔圍，左右都係戴帽嘅男友人，王小姐話：「側田最初坐低同男仔傾偈，冇撩過女仔，不過之後佢就過咗細枱，陪一個長髮眼大大嘅女仔傾偈，呢張細枱只得佢兩個人，女仔着背心裙幾斯文，雖然坐喺度，但佢外表高高瘦瘦，應該高過側田。」問到有冇覺得側田對呢個女仔有好感？王小姐話：「冇特別騷出嚟，佢哋好似朋友傾偈，唔似男女朋友。」王小姐仲話側田雖然飲酒，但唔覺佢有醉意。

記者致電側田了解，佢話嗰日係由細玩到大嘅兄弟生日，食完生日飯轉場去酒吧飲嘢：「身邊女士全部都係太太團，大家唔好誤會，嗰晚我細妹都喺度，我已經有女友，不過佢唔得閒冇出席。」側田仲話讀者見到佢同女仔傾偈，嗰個可能係佢細妹喎。