亞視執笠，港視不獲發牌，有線告急，連巴士上面成日重重覆覆播相同節目嘅RoadShow都傳出喺6月底執笠。雖然唔少乘客都覺得RoadShow又嘈又煩，但其實都幾多集體回憶：

１．歌手新平台
TVB一台獨大都唔係咩新鮮事，主流電視台冇空間宣傳，又淨係捧親生仔。RoadShow出現就俾咗一班奀星曝光機會，當年Ekids、EO2等等都喺巴士個電視機上跳舞。

２．靚女主播
數數手指，RoadShow節目都有好多種，梗係唔少得有班靚女主播傍住。梁慧恩（Viann）就係透過RoadShow入行，近年嘅靚女主播仲有車車（張紫櫻）。

３．18區美食女神
巴士車廂內不准進食，不過RoadShow就諗咗條橋幫你醫肚，搵嚟一班女仔介紹18區美食。不過搭長程車見住班女仔食嘢，其實只會更加肚餓。

４．RoadShow紅人館
節目短短，俾一班娛樂圈中人分享下近況，不過每集時間好短，講嘢三句起兩句止，內容唔夠深入，睇完聽完都冇乜印象。

５．粵語歌曲排行榜
每星期數一次榜，10首歌得前5位會播下音樂，不過最有印象嘅其實係數榜方式，由兩位主持輪流搞個爛gag，就要匆匆忙忙咁播歌。

６．MV播一半
講起流行曲，就要講埋RoadShow啲推介歌，無論播緊嘅係新歌/快歌/慢歌，都只係播到一半就會停，好多時候未入戲肉就完咗，想跟住唱嘅乘客即刻冇晒癮。

７．$5買ringtone
o依家手機唔係iPhone就係Android，換個聆聲好方便。以前RoadShow就有個環節，只需$5就可以下載流行曲手機聆聲，當然啦，唔似又唔啱Key，就冇得怪RoadShow嘅。

８．《恩雨之聲》
《恩雨之聲》其實以往喺亞視/有線都會播，但平時屋企唔得閒睇，喺巴士就會乖乖咁洗滌心靈。

９．煩膠節目
節目重覆又洗腦可以話係RoadShow特色，龐愛蘭嘅《龐愛蘭會客室》、車淑梅嘅《煮場作客》，睇多次都瞓着。車淑梅仲有個健康食品廣告，每次見佢拎住粒軟糖放入口「梅」，零舍令人打冷震。

10．Jackline醫暗瘡
「嘩！Jackline真係好勁呀！」、「Jackline好掂呀」一班MK仔喺旺角街頭大字跳起叫口號，呢個咁經典嘅廣告，搭搭下車見到都打個突。