以下嘅即時新聞字眼相當混亂，睇嘅時候一定要留心少少，特別係陳惠敏同陳慧敏呢兩個名，因為喺娛樂圈有兩位陳惠/慧敏，一個係喺電影入面見到嘅武打影星陳惠敏，一個就係新晉女歌手陳慧敏，當兩位遇上咗，對話會係點呢？

答案係陳惠敏唔識陳慧敏，陳惠敏話：「唔識，新人？新歌星呀？」陳慧敏就答：「4年前參加咗一個歌唱比賽叫《超級巨聲》，當時主持森美介紹我出場用咗你個名，之後啲朋友就開始叫我做『慧敏哥』，我好想多謝你，因為韜咗你光。」陳惠敏：「唔好咁講。」一段好客氣嘅寒喧。

今日nowTv觀星台搵咗兩位惠/慧敏，接受《SpotLight》訪問，佢哋喺紅磡一間紅酒鋪錄影。

陳惠敏好老實咁講：「0依家啲新人邊識吖!都冇留意樂壇，電影新人都唔識啦，佢哋都未必識我呢啲老前輩，個個都話唱歌，嗰個志雄，《古惑仔》嗰個呀，都話自己喺大陸唱歌登台，唱歌？佢連講嘢都走音啦，仲話唱咗幾十場添喎。」惠敏哥所講嘅志雄，咪就係《古惑仔》入面嘅大佬B吳志雄囉，志雄近年都有喺內地登台唱歌㗎。

講到惠敏哥識啲咩新歌手？佢就話：「阿Sa（蔡卓妍）、阿嬌（鍾欣潼）都識，不過都唔係新人咯，我0依家同阿Sa、（黃）秋生拍緊《大茶飯》，我知秋生同嗰個陳咩菁(陳芷菁)爭嘛（演協會長），我認為女仔應該返去煮飯畀老公食，辛苦嘢等男人去做。」

另外，陳慧敏話見到惠敏哥真人好有壓力同緊張，但好多謝佢，當年都係因為借對方個名至畀人記得。