當年今日
關於我們

【獨家】選完港姐再選亞姐 入圍再被踢出局 翟秋平哽咽求高層對話

蘋果日報 2018/09/06 15:00

被退出朱明銳亞洲小姐競選翟秋平

【新增內容】
亞洲電視真係千奇百趣乜都有,亞姐又復活,香港區候選佳麗今日首見傳媒,不過當中有一位佳麗上完兩個星期特訓後突然「被退出」,搞到心情down到極點。
該名「被退出」佳麗名叫翟秋平,今年25歲,喺樹仁大學人力資源系畢業。翟秋平去年同今年都有參加香港小姐競選,仲有前新城台長朱明銳做提名人,又同過「最美麗港姐」朱玲玲合照,可惜都未能入圍。佢於是轉戰亞姐,兩輪面試後即獲通知入圍比賽,但約一星期前,佢突然收到保母電話通知唔使再選。
翟秋平噚晚喺社交網留言﹕「又過了一個星月迷濛的晚上,還是有點難過的。我參加我付出我尊重,亦應該換來被尊重,而不是『被退出』......我還好好的,只是看清了這家機構、這個『競選』的面目和『潛規則』。」
《蘋果》今日致電翟秋平,佢話真係唔知自己衰乜嘢﹕「(被退出)前一日收到保母通知,同我哋講有評核要見高層,咁諗住都入咗圍,只係簡單入紹吓自己。點知見完高層即晚九點幾,保母打俾我話收到公司通知,你要退出比賽,我嗰刻個心離一離,真係呆咗,好不知所措,我都唔知發生咩事,點解係我呢?!」
翟秋平愈講愈傷心,哽咽繼續話﹕「保母都同我講,諗咗好耐打唔打畀你,因為你係最乖、最準時、最守規矩嗰個。我問保母咩原因,你話我唔靚,身材唔好,都同我講吖,但佢話冇,係高層決定,我都係奉命行事。」翟秋平覺得不被尊重,據知評核會面高層當中包括前無綫高層何麗全,但最後通知佢「被退出」嘅只係保母,佢話﹕「其實當日我全日都係公司特訓,咁多位高層,搵一個同我傾五分鐘都得啩,點解連基本尊重都唔俾參賽者,而係搵一位保母,其實即係一個姐姐嚟同我講,真係令我好失望同唔開心!」
問到係咪好鍾意選美?翟秋平話﹕「我唔係對選美情有獨鍾,只係好想參與幕前工作,本身有做司儀,又有喺網台做節目主持,參選係一個途徑入行。」
今日亞姐喺大埔總台舉行亞姐2018香港區決賽記者招待會,亞洲電視行政總裁何麗全就解釋番翟秋平事件,佢話:「其實我都講咗,未見傳媒之前有初賽同複賽,早幾日有同事揀咗呢10位,的確係有幾位冇入選。不過我哋依家好需要幕前,我哋都想同呢幾位女仔成為同事,希望完咗亞姐之後,會再去搵佢哋。」講到翟平覺得不受尊重,何麗全再補充:「我會問番啲同事,睇下有咩唔夠好,我哋同事一齊決定邊10位入選,訓練時有15位,初次面試時有100位。」
精選娛聞,喺晒《娛果》:
http://fb.com/appledailyent
empty
翟秋平一心諗住已入圍亞姐,如今連會見傳媒機會都冇。(互聯網圖片)
empty
翟秋平有做司儀,與前亞視高層葉家寶及亞視前公關黃守東相熟。(互聯網圖片)
empty
翟秋平早前亦有參加港姐面試。