【新增內容及圖片】
現年26歲嘅韓國「馬舞女」泫雅，8月時認戀同門師弟團PENTAGON嘅24歲成員E’Dawn，坦言兩人已拍拖兩年，之後又公然放閃，因而激嬲所屬嘅CUBE事務所。

上月CUBE突然發聲明表示決定將兩人踢出公司，泫雅及E’Dawn都係睇新聞之後先知道自己遭公司解約，不過之後又因CUBE嘅大股東唔希望直接踢走泫雅及E’Dawn，事務所就改口表示開會討論兩人嘅去留問題。

今日CUBE方面就發表官方立場，表示今日跟泫雅正式解約，又指：「再次真心感謝至今為止，一起走過嘅藝人（泫雅）及粉絲。」不過CUBE就未有提到E’Dawn嘅去留問題。

雖然跟公司解約，不過未有影響泫雅心情，近日佢就跟E’Dawn於日本旅行，連日來於Instagram公開多張甜蜜新照，今日下午再於Ig公開二人旅行嘅新相及新影片，當中更有泫雅行過去攬實男友嘅影片，泫雅更笑得非常甜蜜，再次公開放閃。

精選韓流，喺晒《娛果》
http://fb.com/appledailyent