男神王宗堯、周家怡同楊淇有份演出嘅電影版《導火新聞線》預計會喺暑假上映，今晚舉行嘅香港記者協會周年晚宴，《導火》幾位主角同編審潘漫紅等都有出席，仲同記協主席岑倚蘭合照留念。

《囧報》變《囧網》，由紙媒走向網媒，幾位又要做採訪又要打即時嘅《囧報》員工——即係方凝、‎輝爺、‎阿咩‬佢哋，頭先都應邀上台講番幾句。男神王宗堯咁啱仲同廣播道男神蘇敬恆企埋一齊。司儀方健儀即把握機會問兩位男神:覺得輝爺嘅package好啲？定係蘇敬恆個package好啲？

王宗堯就話:「做記者嘅輝爺，又要做廉價勞工啦，又要拍即時啦，又要採訪啦又要做research啦，拍拖嘅時間都冇，剃鬚都冇時間，咁真係好慘。」聞者心酸。

咁邊個package好？識揀，梗係揀劉鳴煒啦，王宗堯都識揀啦:「梗係要揀之前報道過嗰個劉鳴煒BBPackage啦!」貪其高大靚仔身家幾雄厚？唔係。「做記者採訪真相有時好危險，一個唔覺意去銅鑼灣書店買下書，或者揭露咗巴拿馬啲唔知咩文件嘅時候好危險0架嘛，或者你俾人迫去坐洗頭艇嘅時候，咁，係咪揸番本英國護照比較安全啲呢？」

《導火》編審潘漫紅亦有上台，香港樹仁學院新聞系畢業，對於今時今日香港新聞自由，潘漫紅亦有所感:「由2012年，我哋加入HKTV開始，香港就開始變緊，因為『一男子』啦，香港變到好怪異。我哋台上每一個都經歷過電視台好黑暗嘅日子，頭先講到話記者經歷好多艱難嘅時期，我哋都好有共鳴。喺呢個難處裡面，我哋只有一樣嘢可以做，就係唔放棄，咬住唔放，咬住我哋信嘅嘢唔放。」晚宴後，周家怡亦於FB貼圖寫道:「這幾年辛苦了各位新聞界的記者，請堅持着報導事實的真相，繼續肩負着監察社會、監察政府的第四權任務！加油！」

原來今次係記協搵電影公司，希望可以喺會上播《導火》嘅最新預告片，之後仲問佢哋願唔願意慈善買枱支持一下，所以最後以囧報名義買枱，促成咗呢件事，事實上《導火》既所有工作人員都好真心支持記者，難得有呢個機會，所以出錢出力咁支持香港傳媒，聽講今次每張枱要3萬5千蚊，不過大家都好踴躍去訂枱，已經爆晒棚，仲加到49席，認真大場面。