喺《愛‧回家之開心速遞》演細龍太嘅陳偉琪，佢嘅角色背住飾演老公嘅鄭世豪，同何啟南勾搭，被網民話夠晒乞人憎，因而奸出位。

但陳偉琪34E嘅身材，就更加出眾，好似佢今日喺Instagram上載咗張超噴血嘅泳衣照，相中嘅佢着住件針織超V字形嘅泳衣，唔止34E身材盡現，高叉露晒腰嘅設計，幾乎晒得嘅肉都晒出嚟。原來佢早幾日已經去咗泰國布吉度假，連日來佢都有晒泳衣照，不過今日呢張就超性感，佢仲留言︰「Let me be your sunshine on this rainy day.」前一日佢上載另一張性感泳衣照，留言話好多唔同身形嘅女性都有形象問題，雖然佢唔係零號，但佢就花咗好長時間去接受自己。

其實陳偉琪係2013落選港姐，因為身材勁被封為新一代「咪神」，加入大台後，一直演啲閒角或情婦等角色，其實佢能文能武，除咗玩健身、游水、藍球外，就連音樂方面，佢都識彈豎琴琴同鋼琴，唔係波大冇腦。

精選娛聞，喺晒《娛果》
http://fb.com/appledailyent