李錦聯離開大台已經超過半年，雖然冇喺螢幕見到佢，不過出名多諗頭、煮得又talk得嘅佢，之前就打算同鼎爺李家鼎開食店，仲連店名都諗埋叫「鼎李滷味」，點知就俾鼎爺鬧佢黐線，仲話李錦聯抽佢水。(新聞連結： http://bit.ly/2rPwrnE )

食咗鼎爺大大個檸檬嘅李錦聯，近排終於有搞作。佢最近就投資過百萬，同朋友合資喺佐敦酒店入面開咗一間海鮮酒家。酒家開業至今近兩個月，平時喺節目先會表演煮幾味嘅李錦聯，呢日仲大廚上身，入埋廚房做後鑊，切菜、煮麵揀魚翅。自己生意梗係要落力啲。

對於投資過百萬開酒家，李錦聯就話：「呢間酒樓前身喺屯門三聖村都幾出名，咁啱朋友想搬出市區開酒樓，問我有冇興趣，傾傾吓就成事。」問到有冇搵鼎爺取經，李錦聯就話：「本來上次搵佢開滷味店嘅，不過俾佢頂完，乜mood都冇晒啦！」至於冤家安德尊，李錦聯就講笑話：「唔好啦啩，叫佢上嚟又要表演鴛鴦剷呀！」

而佢呢日仲搵咗老死喬寶寶、夏蕙BB同劉錫賢上嚟試食。李錦聯仲專登整咗有寓意又啱佢哋食嘅餸出嚟，佢話：「佢哋一場上到嚟，梗係要煮好嘢食俾佢哋，首先預備咗神油燒白鱔俾寶寶食，神油就梗係唔係印度嚟啦，係用希臘嘅橄欖油煮嘅，至於肥仔賢就要俾碗紅燒鮑翅同香煎咸魚俾佢食，等佢喺亞視過去無綫，可以展翅高飛同咸魚翻生。而夏蕙BB就出名多假髮，咁我今次就整個蒜茸大花蝦俾佢，等佢下次會用真嘢啦！」