周日（9日）將是一年一度國際賽的大日子，一眾大倉口當然盡遣精兵於大賽爭奪錦標，但中小型倉口亦希望能於其他賽事中攞到好成績。

其中華人練馬師容天鵬，有幸能派出「平湖之星」於香港短途錦標與各匹頂班馬一較高下，而他同日亦有不少實力份子出戰其他賽事。今晨（5日）他的參戰馬除「幸運興隆」外，全數提早進行最後試跑，《蘋果馬經》晨操專家積奇亦對部份馬匹有不俗的評價。

「嘉應傳奇」副練跳一段，中檔按住順走，收身線條靚，毛色轉深，翻步急密有力，上仗跑得好，復課勇況續添。

「都市神話」潘頓跳兩段，戴眼罩，靠外欄走過，拼後有正常操練，馬身唔瘦，神態活躍過步爽，終點後走到對面直路才收慢，健康狀態均對辦。

「都市神話」今季四戰三亞，始終未能交出頭馬，上仗易手一試，仍然未能開勝門，敗於超班的「數糊勇士」蹄下。今次潘頓重新接手馬匹，加上狀態充足，強手已去之下必望能敲響勝鼓。