CEC國際（759）主席，阿信屋老闆林偉駿，於商台881節目《雲常開》接受陳志雲訪問，講到對梁振英睇法。他表示，「喺董生（董建華）年代，我已經覺得佢（梁振英）有機會，我同伙記講，呢個人好似好特別。」他又指，當年出席工商界活動時，全部人都支持唐英年，只有他一個支持梁振英，「我係好真心支持佢」。

「但到今日，用一個好方面去講，唔係驚佢清算我，但呢個機制，董生都企唔住，其實佢地係咪好難做，同埋上面係咪有啲要要求，有啲嘢，唔係佢自己想係咁，人在江湖，從呢個角度睇。」

「今日香港經濟力弱到咁樣，物流無晒啦！你話金融？算啦！一早都冇啦！香港人仲有啲咩？你話返大陸，返大陸已經冇我地競爭力，咁點樣呢？香港其實已經係沉緊落去。」他認為政府應牽頭協助香港商人，如與不同國家簽署貿易協議，但目前政府卻未有著手處理。

他又再一次提到，自己80至90年代，曾三次希望加入共產黨，更親自組織黨支部，但由於他不肯放棄香港身份證，因此市支部否決其申請。

他又再提到，曾鈺成是他的偶像，自己亦曾加入民建聯，但早已沒有交會費，「嗰時嘅民建聯係一個團體左派嘅團體，依家嘅民建聯係一個執政黨，佢要吸專業人士，我都唔係。」

對於他被指是「黃絲」，他表示，「其實我黃又唔係，藍又唔係，我自己都唔知自己係乜。我係一個現實主義者，我自己走我嗰條路，係一個生意人條路。」

掌握財經生活資訊，即Like「蘋果ATM」fb專頁啦！
http://fb.com/appledailyatm