解構李麗珍不老的傳說
三十六歲的李麗珍雖然已為人母,但她卻得天獨厚,外表仍然帶有少女味。本報日前邀請阿珍接受訪問和拍照,將阿珍現在的照片和她二十歲時的相片對照,發覺她臉上幾乎沒有留下歲月的痕迹,實在羨煞旁人。
阿珍透露女人最重要的,就是保持身段和保養皮膚,所以她對體重十分緊張,一定不會讓自己超過一百磅。
李麗珍說:「我生咗女之後瘦咗,𠵱家九十五磅,可能因為我𠵱家唔食零食,所以冇咁易肥。不過一百磅係我嘅警戒線,超過咗就要即刻開始減肥行動。」
阿珍賣大包向讀者公開減肥和美容心得,大家記住以下七個錦囊,就可以好似阿珍咁弗啦!
梳打餅頂頂肚
「當年我生完BB後肥咗好多,減肥心得就係每日起身第一餐要食得好飽,唔會畀自己餓親,咁晏晝就可以唔食,到咗下午茶時間,就食幾塊餅,通常我會食梳打餅冇咁肥,呢幾塊餅好重要,因為唔食嘅話,夜晚嗰餐就會好肚餓,所以一定要食,晚餐就盡量食少啲,消夜一定唔可以食。我自己唔食牛肉,但其他肉類都食。」
澱粉質遠離我
「如果要快速減肥,通常我會揀戒澱粉同糖分,只戒三日,就可以輕幾磅,不過長時間戒對身體唔好。」
「小路寶」去脂肪
李麗珍在銅鑼灣和尖沙嘴都開了美容院,所以用儀器減肥和做facial都不用花錢,年中省回不少。阿珍說:「公司所有減肥產品我都用過,我覺得最有效係『搣脂小路寶』,佢將身上啲脂肪軟化,排出體外。」
皮膚靚靠面膜
「我𠵱家兩個禮拜做一次facial,如果有時間,一個禮拜做一次係會好啲嘅。」
向脾氣SayNo
「個人開心啲,樣都靚啲。但我自己脾氣唔好,有時發脾氣會掟嘢,以前我鍾意掟鬧鐘,所以成日要買鬧鐘,𠵱家都會掟嘢㗎,不過就揀啲掟唔爛嘅嘢,好似枕頭咁。」
大水桶唔怕做
「最緊要飲多啲水,我規定自己每日至少要飲幾多,總之一有時間就飲,亦可以飲鮮榨果汁。」
做運動瞓得好
「瞓得好好重要,以前細個拍戲我可以去到邊瞓到邊,但𠵱家就唔得。不過自從我做咗運動之後,就瞓得好咗,𠵱家我每個星期做兩個鐘頭健身,其實我都係上年做舞台劇《聊齋新誌》嗰陣因為驚唔夠氣,所以去做運動,𠵱家身體好咗好多。」
採訪:張止寒
攝影:陳志嵐
協力:羅慧敏
化妝:JennyTziong
髮型:DanielCheng、Matty(Chin.G)