走入紐約古根漢美術館，赫然見到六部汽車從百幾呎嘅樓頂垂落嚟，個車身仲插滿發光電纜，畫面真係幾震撼。呢件係中國藝術家蔡國強嘅作品，正喺古根漢美術館首個為華裔藝術家策劃嘅個人回顧展中展出。藝評人話，蔡國強表達嘅係恐怖分子人肉炸彈造成嘅場面。對曾受911恐怖襲擊嘅紐約人嚟講，呢個作品感覺特別強烈。
今次展覽由何鴻毅家族基金贊助，上星期五開幕嗰日，就遇上紐約大風雪。不過，紐約市民反應唔錯，頭幾日嘅入場人數比平時多三倍，連國際著名建築師貝聿銘都有去睇預展。蔡國強話，中國人要成為國際知名藝術家話難又得話易又得，難嘅係要喺咁多中國人中脫穎而出；易係因為全世界都有中國人。