猶記得兩年前左右，黎明仲未識玩fb嘅年代，嗰陣已經好多人玩fb live，起步較遲嘅黎明仲係用緊上片功能，嗰條片叫做「人生中的1分41秒」，為歌迷獻唱半首《願你今夜別離去》，女fans當然冧晒。但可惜，唔係fb live，冇得即時互動。

黎明話：「公司同事話我再唔開facebook就out，再唔做就入棺材封棺o架喇！」又話：「叫我阿叔都唔mind㗎，封我金句王都唔理，好多時睇你用咩視野去睇，（略）但我承認我有啲怪誕嘅！」

黎明又真係講得出做得到，之後好俾心機經營fb，又明蝠俠又有公關，感覺煥然一新，被譽為「最識玩Facebook藝人」。最經典之作，肯肯定就係佢化解2016年4月喺中環龍和道海濱活動空間舉行嘅演唱會取消嘅公關回應，堪稱公關危機處理教材。

當日黎明完全唔需要公關代表，唔需要經理人，一個人，直接透過Facebook，面對公眾，解釋、道歉、同更新最新情況（文章連結：　 https://bit.ly/2pCBuIe ）之後黎明更手執大聲公，分別於正門及側邊鐵絲網向fans道歉：「好對唔住，睇下點樣安排第二日啦，退飛或者點樣……我哋會盡量於24小時解決答案。」歌迷失聲痛哭之餘，亦為之動容。

喺嗰段時間，短短一星期，黎明嘅專頁Like數，升咗97.2%！

今日有周刊報道稱，以上種種，原來同黎明現任女友Wing都有莫大關係喎！

報道指，2015年，同黎明合作廿載嘅經理人陳善之離開，黎明冇咗經理人，而Wing就「順理成章」幫黎明手。32歲嘅Wing話晒都係80後，會玩facebook，報道指黎明嘅social media策略，Wing係幕後軍師，唔止成功令黎明形象young晒，亦化解咗公關災難，更成功吸納咗好多年輕人fans。而黎明舉行個唱出事期間，Wing已經係佢身邊大紅人，黎明仲經常喺同事面前讚佢有創意。

嘩，Wing咁犀利，真係一個人足可力敵曾俊華選特首期間嗰team「創意及社交媒體部門」喎！

報道又話，黎明自從2012年離婚後，更加深閨，成日匿喺屋企，就連平時聚會，或者同同事開會，都係喺佢位於上水雙魚河三層獨立屋進行。但黎明身邊嘅朋友、同事不少已成家立室要早走，得Wing可以留到最後，亦因為咁造就兩人獨處機會，感情猶然而生。

機會係真係留俾有準備嘅人！

相關文章：
【終於識用fb live】fb達人黎明直播住食熱狗答問題
https://bit.ly/2IO3OzT