【新增《Real》宣傳活動內容及圖片】
由韓國男神金秀賢主演嘅新片《Real》，前日喺韓國上映後，韓國觀眾嘅反應就認真麻麻，票房同口碑都唔多理想，雖然《Real》首日開畫就引近15萬人入場捧場，但由於電影被評為19禁，所以首日開畫票房就唔及同日開畫、由韓劇《Signal》男星李帝勳主演嘅新片《朴烈》，《朴烈》首日開畫連累計就有逾22萬人入場。

由於《Real》負評甚多，加上上映首日已有電影嘅片段同照片喺網上流傳，即時令到觀影人數勁跌，根據韓國電影振興委員會今日發佈嘅數據，《Real》噚日觀影人次勁跌近9萬人，噚日只得57,739觀眾捧場，至於《朴烈》亦都第一日票房跌咗，噚日票房有141,279人次。

另外，《Real》嘅製作公司今日就發表聲明話發現網上有盜錄《Real》嘅片段散佈，屬嚴重侵權嘅行為，製作公司已經向處理網絡報案嘅部門報案，並會追究法律責任。而金秀賢同Sulli今日就現身戲院為電影繼續宣傳，並即場送出海報畀粉絲。