江若琳同Oscar嘅婚宴喺紅磡一間酒店舉行，筵開45席，宴請親朋好友，場內擺咗佢哋之前影嘅婚紗相，仲有兩本相集放喺接待處旁邊，一對新人下午5點半出嚟見傳媒。

Oscar自爆床頭擺咗「閃卡」，指入行時冇福氣同江若琳合照，Oscar解釋：「我將佢張閃卡同自己張證件相，黐埋一齊，放喺床頭。」問到有冇咩感動位，江若琳就話：「由噚晚上頭開始，已經一直開住『水喉』，媽咪同我上頭，把梳一掂到我個頭，我已經想喊，因為我哋開咗盤口，估邊個會喊先，為咗姊妹著想，我惟有忍住，另一個感動位就係著咗婚紗，爸爸幫我蓋頭紗嗰陣。」Oscar喺婚禮上最先喊，佢話因為婚禮現場播出《One And Only》呢首歌，佢話：「跟住見到佢出場，當時覺得好似自己發緊夢咁，好感動，先開始扁嘴同咬唇，佢哋以為我喊，咁之後都真係有喊，因為真係好感動，朝早接新娘覺得好好玩，到下晝簽字時，有律師在場，又有親友喺度，就覺得好認真。」江若琳反問佢係唔係反悔，Oscar笑言：「唔係喇!」二人打情罵俏。

講到婚宴有冇驚喜位，Oscar爆：「兄弟有夾咗一啲嘢，婚禮主題係聖誕party，場內好似一個嘉年華咁，有一棵三米高嘅聖誕樹，有啲攤位，有香水吧，賓客可以自己調配香水，大家聚吓舊、玩吓。」Oscar稱婚宴使費七位數字，一切由太太江若琳籌備，最重要係太太開心。

江若琳指過幾日去英國度蜜月，之後再去周邊城市，Oscar稱本來太太好想睇北極光，不過太太怕凍，佢就叫太太不如去泰國睇，生B方面，佢哋話希望順其自然，而江若琳就想出年生「豬B」。此外，Oscar早前豪花幾百萬買鑽飾俾江若琳，先訂造2卡求婚鑽戒，同時又訂咗一個鑲咗345粒副石、價值七位數字嘅皇冠送俾江若琳。

精選娛聞，喺晒《娛果》
http://fb.com/appledailyent