嘩！因乜事土超忽然之間變得咁馨香呢？四屆非洲足球先生伊度奧同德國國腳普多斯基呢日都傳出隨時會去土超落班咁話呀。

據英國傳媒報道，來季升上土超的安塔萊亞已經接近落實羅致喀麥隆前鋒伊度奧，仲話已經同佢傾好咗條件，不過由於伊度奧喺意大利仲有啲肖像權問題未解決，所以要拖多陣喎。除咗伊度奧，另一位國腳級射手普多斯基亦都盛傳會轉投加拉塔沙雷，有傳佢今次轉會人工都唔錯，周薪有成100,000鎊（約122萬港元）。雖然未有正式公佈，不過英國嘅《skyBET》就已經將普多斯基加盟加拉塔沙雷嘅盤口封盤，睇嚟成事機會真係好高。