上星期三公屋富戶申報截止，好多人為交表保住間公屋，酷熱天氣下排足一日都要死頂。我實在唔明，富戶交還單位由「雙軌」變「單軌」，又係政府自己提出，但明知今次申報要花更多時間審查，硬係唔可以安排好啲，係班官好唔抵得公屋租戶平租咗咁耐，襯今次整鋪杰嘅畀佢哋嘆？定係唔畀人鬧會瞓唔著呢？

除咗排隊排餐矇，過去一年仲有超過4萬戶，急急去刪除戶籍，比過去幾年平均多近20%，為咗間公屋，大家都搞盡腦汁，聽過啲有趣case 可以同大家分享。

醒目阿媽：早幾年見自己同老公年過六十，點都唔會被人趕走，立即將阿仔同加讀緊書嘅女拆戶申請多間公屋，然後等抽不受歡迎單位，勁好彩第二年就中咗，揀咗個低層近垃圾房單位，但爽皮在係「租置計劃」屋邨，拿拿臨full pay買埋，雖然唔係私樓，但總算成功幫藍領阿仔築定個巢。

窮書生變筍盤：我讀大學嘅年代，公屋真係3年上樓，梗係喇！果陣有幾多大學生咁有遠見，諗到原來做牛做馬十幾廿年都買唔起樓唧？聽聞有位窮書生，因為家庭問題一入U就要入宿，預咗畢業都返唔到屋企住，於是即刻申請公屋，結果拎到degree亦係上樓之日，果陣啲單人公屋無而家咁袖珍添。佢識揀專業學科讀，出嚟人工高又力爭上游，一路平租一路儲錢，好多年前已經用公屋換咗居屋，而家幾層樓喺手喇!

求凍薪爸爸：一個養四個嘅好爸爸，做嘢勤力上進得老闆賞識，但佢對老闆嘅唯一要求係：千祈唔好加我人工！因為人工一加就爆數公屋止步，凍咗幾年薪終於等到，上樓轉工加人工，從此生活好輕鬆！

當然，亦聽過有人用旁門左道攞公屋喇！但啲衰嘢就無謂分享，以上三個case 都係捱過咸苦、有家庭原因，或者十分好運先至成功，而家呢枝歌仔都無乜得點唱lu~

專欄作者簡介：
吳宛盈Carol
做咗10+年電視地產記者，又窮又奄尖喺香港上車無期，幾廿歳學人尋自由玩劈炮，乜都試又睇吓會唔會餓死？

Facebook專頁：
https://www.facebook.com/carolngyy

發掘更多身邊的小城故事，請LIKE 蘋地Facebook Page，並設定為「搶先看」： https://fb.com/appledailyland