當年今日
關於我們

【接王菲班闖娛圈】童童拍MV前扯煙王菲出錢捧愛女

蘋果日報 2015/09/24 06:00

蘋果王菲竇靖童即時扯煙娛圈拍MV出錢棒愛女

王菲同18歲大女竇靖童(童童)一向感情尤如密友,不時攬頭攬頸,有指王菲近年為大女童童鋪路入樂壇,上個月以香港歌手身份參加日本舉行音樂會,與當地樂隊交流音樂,更以日文同英文與在場嘅觀眾打招呼,甚有台型,年尾仲會出首張處女碟,下個月將出演北京開一連三場大型音樂會,話晒童童自細熱愛音樂,上年喺美國讀完高中課程,預備做唱作歌手。

今日有周刊指,童童預咗今年闖樂壇,上周被影到喺香港街頭拍MV,童童以一頭短髮示人,一身中性打扮,有啲阿菲當年嘅影子,更被影到當街扯煙,手勢仲好純熟,本來隨手掉煙頭,不過,同行工作人員提醒,童童即刻執煙頭,放咗司機個手提煙灰缸。

據周刊引述知情者表示,本來陳家瑛完咗同陳奕迅經理人合約,已經想半收山,不過見王菲要交童童畀佢,陳家瑛都冇拒絕,不過,王菲都知目前做歌手,同以前好唔同,搵錢已經冇咁易,王菲都唔介意攞錢棒愛女童童做樂壇新人,仲話童童上個月去日本帶咗成十幾人過去當地,亦係由王菲贊助,又話童童下個月喺北京表演,王菲都畀晒製作費,對於童童越來越多紋身,王菲都只係問童童唔覺痛咩,王菲更以過來人身份,同童童講自己紋一次就夠,仲記得王菲當年同男友謝霆鋒玩愛的紋身!