經過國際賽期，英超周六早場會有利物浦作客撼曼城嘅大戰，由於兩隊都有好多巴西兵噚晚踢完世盃外，所以兩隊先禮後兵嚟個大和解，計劃夾份租架私人飛機，將菲臘比古天奴同埋加比爾捷西斯等球星「打包」直達英國，而車路士都會加入接埋韋利安返倫敦。
曼城同利物浦本身就冇乜仇口，只係今個禮拜英超早場互撼啫，大家就君子啲一齊包機送班巴西兵返國，起碼唞多幾個鐘。曼城有加比爾捷西斯、費蘭甸奴同埋龍門艾達臣摩拉斯；利物浦就有古天奴同埋羅拔圖法明奴係巴西國腳，而車路士都有份夾錢，順手接埋韋利安返去。

伊巴古天奴入歐聯名單

呢三間英超豪門已經唔係第一次咁做，上年11月同樣係巴西踢完世盃外，佢哋已經包機將一班巴西兵送返英國。
至於周一歐洲足協亦公佈所有歐聯參戰球隊嘅大軍名單，利物浦方面鬧轉會嘅中場古天奴走唔成，所以繼入選英超名單後，入選埋歐聯名單都好合理，反而右閘尼達利基尼就冇份，換言之佢大有機會因背傷休息到起碼12月中。同時，西班牙《阿斯報》報道，祖雲達斯原來今夏同意以1.2億歐元（約11.2億港元）將前鋒保羅戴巴拿賣畀巴塞，但巴塞一路希望得到古天奴所以放棄咗戴巴拿。
曼聯今季亦都重返歐聯，名單中早前簽約回歸嘅瑞典前鋒伊巴謙莫域都榜上有名。35歲嘅伊巴謙莫域上季尾右膝受傷預計要唞到出年一月，不過佢之前已經可以飛腳踢沙包，證明雙膝發力冇問題，睇嚟呢位骨骼精奇嘅悍將可以提早候命。