「我是給人加害！」
「請你不要再說謊啦！你的老女人快會將你的醜事掦出來啦！我只是不想再跟你們這亂七八糟的人再啦上任何關係！請不要再傷害我啦！」

男嘅一個59歲，女嘅一個56歲，加埋過百歲，喺網上公開呢段對話。

的確，正正就是麥德羅，同Big Echo老闆娘劉麗萍（Apple姐）。兩人喺fb嘅一段公開對話。

前文係，Apple姐稱收到一個女人來電，話自己收到一個女人來電，女方聲稱自己同麥德羅有不尋常關係。於是上周六Apple姐一大早就喺fb宣佈要同麥德羅分手，仲貼埋嗰位女主角嘅相出嚟：「我三年前已經發現他們WhatsApp很暖味，已警告他不要再理會這女人，他答應了又卻跟她繼續來往，如今這女人跟我哭訴他們也已交往三年，更被騙感情！」佢話有質問過麥德羅，但麥德羅唔認。

麥德羅堅稱同嗰個女人冇嘢，仲話對方「成日套我啲嘢，然後同番Apple講，噚日佢send咗啲相畀Apple睇，搞到佢好嬲，我哋嗌咗場大交，佢走咗去，我依家都未搵到佢。」揚言冇發生肉體關係，更稱對方「大我冇十年都七八年，有四個孫，做咗嫲嫲。」

就係咁，吵吵鬧鬧，有啲fb出嚟留言做下和事佬咁，包括就嚟嫁人嘅李偲嫣。佢喺fb留言：「親愛的Apple姐：千萬要保重身體！繼續美麗」唔知點解Apple姐好多都有覆或者俾like，但呢個就冇。

分手後，Apple姐繼續密鑼緊鼓籌備佢嘅「百萬巨星」歌唱比賽，日前飛去吉隆坡舉行記者會，宣佈同馬來西亞MVTV Asia電視台合作，麥德羅都有去，兩人企到離行離列，仲住唔同酒店。麥德羅就繼續呼冤，揚言會努力箍煲。

Apple姐接受周刊訪問，表明計劃搬離愛巢，仲話呢個女人係兩人分手導火線之一，但麥德羅嗜杯中物，亦係分手原因。Apple姐感謂，飲咗酒嘅麥德羅會變成另一個人，又話麥德羅可能年輕時紅過，仍然沉醉以前紙醉金迷生活，Apple姐話只有靠呢啲年紀大嘅fans，滿足佢嘅英雄主義。

Apple姐仲話，有勸過麥德羅戒酒，但對方拒絕。

要愛人，必先要懂得自愛。