今晚平安夜，陳凱琳（Grace）、劉穎鏇同孫慧雪喺屯門出席倒數活動，同fans一齊倒數同玩遊戲。

Grace啱啱公佈陀小嘉穎(新聞連結： http://bit.ly/2Slse8y )，今日活動上神采飛揚，好高興咁同fans影合照，活動上三人又互送聖誕禮物，劉穎鏇就話要好多小朋友物品俾Grace。大會又要求三人做瑜伽pose，結果雪雪最柔軟，而大肚婆Grace只係舉高手。

Grace受訪時就相當開心，佢話：「終於可以同大家講，收到好多人祝福，今年兩個人過，暗地裏有第三個，諗到出年好唔同就好溫暖。嘉穎今日喺美國返嚟，今晚返到香港，自己出嚟做嘢未見到佢。」Grace又話收到好多禮物俾小朋友，自己會忍手唔買住，但佢就笑嘉穎一出街就睇BB嘢。咁會唔會呷醋？Grace話：「唔會呷醋，如果係女就會，佢同我講第時囝囝出咗世，到時唔好唔記得老公。」而聽日聖誕節，就會同雙方家長食飯慶祝。

之前有報道指兩人為咗小朋友，已經搬咗去天后豪宅，方便兩父子喺同一間學校讀書做「師兄弟」，Grace否認：「吓，唔係喎，冇搬屋。」問佢係咪打算生完先搬？佢話：「未，0依家嗰度空間都仲夠住。」好多大肚婆都期待產檢，Grace都一樣，講到產檢就露出燦爛笑容：「係呀。」仲話老公已經搞清楚，睇超聲波大條嘅物體係臍帶嚟，唔會再諗錯。

劉穎鏇話聖誕會陪爸爸，但聖誕都要為拍劇準備，爸爸就幫佢翻譯劇本，今次角色同《兄弟》唔同，呢次就唔使打要人保護。之前有人講佢仲有外國口音，所以希望努力改進。同場仲有孫慧雪，已有一個囝囝嘅阿雪，獲大會送咗一張孕照，預祝佢來年再有喜，生番個B女，湊夠個「好」字，問到佢係咪都想再做媽咪，佢話︰「冇呀！明年嘅工作都排得好密，暫時唔會住，老公都批准，因為知道我忙於工作，過多兩年先，o依家湊囝囝都覺得好攰，會專心拍劇先。」

問到點解老公唔畀佢做少奶奶？阿雪話︰「老公鍾意我勤力，初時以為係讚美，到o依家終於都明白。」至於陳凱琳有冇同佢取經學湊仔，「都有，Grace問我有冇做孕婦瑜伽，初時都日日上堂，後來因為BB頭圍太大，自然分娩唔到，結果都係開刀，嘥咗之前學孕婦瑜伽。」

精選娛聞，喺晒《娛果》
http://fb.com/appledailyent