頭先講到，進擊的Mango王秀琳，退選港姐Judy一左一右夾實莊氏集團太子爺、有80億身家嘅莊家彬，唔止一齊去滾，進擊的Mango仲攬實莊家彬，一齊唱K，唱唱下又攬腰又盛，加上之前報道話佢一開始就已經好想同莊家彬飲酒，直頭連食物都等唔切就飲——空肚飲酒，一定出事啦。最後，兩個醉醉地嘅人唱唱下歌就碌咗落梳化喇……

進擊的Mango，大家都知係王秀琳。咁退選港姐Judy呢？零印象？就係浙江傳媒學院畢業，面試當日，拎住個巴黎世家，大騷36G上圍嗰個，仲俾人話佢係官恩娜。佢嘅驕人身段加上逼爆上衣確是令人難忘，但亦有傳因為佢個樣過分人工化，故被大台準備Out出局，但Judy早一步，喺ig公佈因私人原因退選，仲話抱歉讓大家失望，謝謝一直以來的關心和支持。

估唔到，因私人理由退選嘅Judy，依家忽然成為周刊封面人物，報道仲話佢係莊家彬新歡——不過莊家彬同女友程新惠仲拖緊手仔喎——anyway，日前山林道火鍋店嘅呢個飯局上，Mango對莊家彬伸出友誼之手，本來左擁右抱都ok，但當Mango要求同莊獨舞時，Judy點好呢？

報道指當時席上嘅創興銀行創辦人廖寶珊個孫、38歲嘅「少年樓王」廖偉麟本來都好想同Judy做朋友0架，有指佢當時更輕擁Judy纖腰，以示親切感，但Judy就似乎好冷淡。最後廖偉麟話「有事!」走先。

不過其實Judy都輸唔晒，為向莊家彬表示「做朋友」嘅誠意，36G嘅Judy亦把握機會，一埋到莊家彬嘅身，捉住對方坐埋一角咬耳仔，女方隻手仲搭咗去莊家彬膊頭上，用最近距離表現誠意。