【新增動新聞】

以傑斯、碧咸、史高斯、尼維利兄弟等組成嘅曼聯七小福，可以話係紅魔鬼近年最成功青訓，幕後功臣係青年軍教練艾歷夏里遜，不過呢位為曼聯工作27年嘅老臣子，今年患上認知障礙症﹝前稱老年痴呆症或腦退化症﹞，不過一眾弟子絕對冇忘恩負義，亦都不時去探望佢。

艾歷夏里遜今年確診患上認知障礙症，當一眾弟子知道消息，就算好似碧咸呢個大紅人，都抽時間探望；夏里遜女兒域琦話：「我仔仔祖爾睇到爺爺手機，知道有呢班球星電話，就大膽搵佢哋，唔使一星期，佢哋就陸續出現探望爸爸，我都覺得好意外。」

域琦話79歲嘅爸爸身體都唔錯，最搞笑係班球星對住夏里遜，仲顯得膽怯，不過最難過係爸爸對足球失去熱情，好少睇足球電視直播，而祖爾正籌備緊倫敦至白禮頓嘅單車慈善賽，為認知障礙症籌款，預料七小福都會有錢出錢，有力出力。