建制派以往恃着議會人多，好鍾意講：「有咩唔同意，投票囉！」唔知係咪因為咁，民主派今時今日喺區議會，成日都用投票解決爭議。好似今日深水埗區議會中，民建聯劉佩玉決定狙擊李文浩和劉家衡早前喺辦事處張貼「藍絲與狗不得內進」單張，話單張內容極具歧視及侮辱性，動議向二人表示遺憾，要求兩人收回言論。

劉佩玉講到好大㗎，又話13萬人聯署反對有關告示，又話歧視、又話事態嚴重、議員嘅行為已超越作為公職人員的底線云云，點知成個動議僅得1位議員和議。

有民主派議員就認為，區議會根本無權調查議員嘅言行，亦不符區議會職能，表明唔會支持，民協江貴生更加提出動議，要求暫停討論劉佩玉嘅動議，結果獲21人贊成，令劉佩玉嘅動議連表決的機會都冇，拜投票所賜而拜拜。

將「藍絲與狗」變「藍絲暴徒」
劉家衡：唔想侮辱狗

事件嘅主角，即係「藍絲與狗不得內進」呢張單張，有新「情況」。貼呢張單張嘅李文浩喺會上透露，因為單張畀班藍絲「一篤一篤痰」咁吐落去，由於衞生問題，已經扔掉，劉家衡補充，最新嘅單張已改為「藍絲暴徒不得內進」：「因為唔想侮辱狗隻。」

-----------------------------
登記選民按此
香港人，反攻！
登記做選民，5月2日截止
-----------------------------
App內1-Click訂閱《蘋果動新聞》
按此了解更多